Reshuffling/Reassignment sang mga Chief of Hospital, ginmando Gov. Lacson

May pagbalasa nga natabo sa mga Chief of Hospitals sa bug-os nga probinsya sang Negros Occidental sandig sa ginpapanaog nga Reassignment Order ni Governor Eugenio Jose Lacson napetsahan Hulyo 18, 2022.

Ginpaalinton ni Provincial Administrator Atty. Rayfrando Diaz II ang nasambit nga panibag-o nga assignments igapatuman sa sulod sang 15 ka adlaw kasunod ang mga naapektuhan sang reassignment naghingyo sang transition period.

Suno kay Diaz magapungko nga bag-o nga Chief of Hospital sang Cadiz District Hospital amo si Dr. Claudelia Josefa Pabillo halin sa Lorenzo Zayco District Hospital sa syudad sang Kabankalan kun sa diin ini siya ang pagabuslan ni Dr. Myre Parpa sang Valladolid District Hospital, si Parpa ang pagabuslan ni Dr. Josephine Pahamtang halin sa Cadiz City District Hospital.

Gin-assign naman nga mangin COH sang Gov. Valeriano Gatuslao Memorial Hospital sa syudad sang Himamaylan amo si Dr. Jiji Lucil Felicitas Versoza nga Chief of Hospital sang Eleuterio Decena Memorial District Hospital sa banwa sang Hinobaan.

Samtang ang mangin COH sang Ignacio Arroyo Sr. Memorial District Hospital sa banwa sang Isabela amo si Dr. Neil Natu-el halin sa Merceditas Montilla District Hospital sa syudad sang Sipalay kun sa diin ini siya ang pagabuslan ni Dr. Glicerio Javellana.

Ang mangin Chief of Hospital sang Eleuterio Decena Memorial District Hospital amo si Dr. Lalaine Teorima halin sa Ignacio Arroyo Sr. Memorial District Hospital sa Isabela.

Samtang magapabilin sa gihapon nga COH sang Teresita Lopez Jalandoni Provincial Hospital sa syudad sang Silay si Dr. Mary Ann Maestral.

Ginpahayag ni Diaz ang nasambit nga reassignment ukon reshuffling ang sa interes sang ginatawag nga serbisyo publiko kag sa pag-imprubar sang pagdumala sang mga hospitals.

Leave a Reply

Your email address will not be published. Required fields are marked *