GIREKLAMO sa pipila ka residente sa GenSan ang gilayong pagbaha dungan sa nasinatiang pag-ulan. Sa pag-ulan, Martes sa gabii apektado ang pipila ka barangay sama sa San Isidro, Mabuhay, Lagao ug City heights.
Gitudlo sa usa ka residente nga rason sa pagbaha mao ang pag-awas sa tubig sa irigasyon ug pag-awas usab sa drainage gikan sa subdibisyon, asoy ni Rino Berdon. Nagpatabang usab ang usa ka residente sa Purok Nopol, Barangay Mabuhay human nabangag ang yuta sa dalang ginagian nila tungod sa nasinatiang pag-ulan.
Lisod ug delikado na ang alang sa mga motorista nga moagi sa lugar, hinungdan nga nanawagan og tabang sa gobyerno, asoy ni Leni Ponce. Sa bahin ni Engr. Emerald Signar, City Engineers Officer (CEO) bisan paman wala’y ulan padayon ang ilang maintenance sa drainage canal.
Naghimo na sila og massive operation sa dredge waterways ug declogging sa mga drainage system human nga nagbara ang daghang basura. Nagtuo si Signar nga kung makumpleto na ang master drainage plan sa GenSan nga gihimo atong 1998, kini ang solusyon sa problema’ng gamay’ng ulan baha sa gensan.
Sa karon, naa pa lang sa 54% ang nakumpleto drainage plan sa siyudad. Una nang, gibutyag niini nga ang kinahanglang i-modify ang drainage system tungod sa padayong paglambo sa siyudad tungod sa nagkataas nga migration rate gikan pa sa mga nakalabay’ng tuig. I Richel Gubalani