Resolusyon sa uniform border control gipagawas na

Naghulat pa karon sa tubag ang Regional Inter-Agency Task Force (RIATF) 11 gikan sa national government sa gisugyot nga pagpatuman sa Uniformed Border Restrictions sa tanang utlanan sa Rehiyon Onse.

Kini human nasumite na sa RIATF ang resolution sa maong plano apan wala pay tubag nga gihatag ang NIATF.

Una niini gibutyag ni Department of Health-XI Regional Director ug Co-Chair sa RIATF Dr. Annabelle Yumang nga kinahanglan ang maong lakang aron makontrola ang lihok sa mga tawo pasulod ug pag-gawas sa Davao Region ug aron malikayang makatala sa bag-ong variants sa COVID-19.

Base usab sa resolusyon nga gipagawas sa OCD-XI, sa Section 5, ang pagpangayo sa negative RT-PCR test result alang sa mga turista o mga non essential travellers nga dili residente sa rehiyon onse kalakip sa accomodation confirmation sa adtuang tourist area ang gikinahanglan ayha makasulod.

Alang sa mga dili residente apan dunay importanteng tuyo sa Davao Region kinahanglan lamang magpresenta og pamatuod sa byahe sama sa medical appointment, referal o bisan unsang dokumento nga makapamatuod nga esentyal ang tumong sa pagsulod.

Giklaro usab sa resolusyon nga kinahanglan dili maapektuhan ang movement sa mga cargoes ug goods apan kinahanglan sundon ang heslth protocol.

Tugutan ang mga travelers nga moagi lang sa Rehiyon sa kondisyon nga wala kini hapitan og moderetso na gawas sa border control points.

Samtang sa Davao City sa kasamtangan, ang mga travelers gikan sa Luzon ug Visayas ang ginapangayuan og RT-PCR result base sa pagpaklaro ni Davao City Mayor Sara Duterte-Carpio.

Sa laing bahin, gibutyag usab ni DILG-XI RD Alex Roldan nga mag-agad sa mga local chief executives sa mga LGU’s ang pagtakda og petsa sa implementasyon sa UBC base sa mamahimong koordinasyon sa Regional Task Force CoVid-19.BNFM-DAVAO