Indi makapati si Marte Dalida kung ham-an imaw ro ginkustodiya it Balete MPS samantalang imaw ro nag report ag nagsaksi sa insidente it pagpang eabo sa Sitio Maeobog, Brgy Calizo, Balete, Aklan ku dominggo.
Sa interview kana it BRIGADA NEWS FM KALIBO, natabo ro pagpang eabo sa tunga it anang bayaw nga si Edcel Quindong ag tiyo kara nga si Rex Quindong nga ginbawian it kabuhi.
Ginhayag man ni Dalida nga may away ro daywa bangud ku nagtaliwan nga dominggo hay binunaean segun ni Rex it kawayan ro Ina ni Edcel.
Gin insister ni Dalida nga owa imaw it kaangtanan sa kremin ag sa kamatuoran hay imaw pa ngani ro nagreport sa Balete MPS sa insidente.
Umapela man raya sa pamilya it mga imbolbado nga klaruhon ro mga hitabo bangud owa segun imaw it kahilabtanan sa kremin.
Matandaan nga nagaguwa sa inisyal nga imbestigasyun it investigator-on-case nga si Police Staff Sergeant Jorie E Junio, nga ro krimen hay natabo sa baeay ni Rex, nga kabaliskaran sa unang pahayag it saksi nga si Marte Dalida. // ANN DESLENE SALAZAR