Salesman, ginaalegar gin-hold up sa Brgy. Dinginan, Roxas City; P100-K nataban!

Nataban sang wala makilala nga mga suspetsado ang mas o menus P100,000 nga cash matapos ginaalegar gin-hold up ang isa ka Salesman sang Frozen Foods Products sa National Highway sang Brgy. Dinginan, Roxas City takna alas 4:45 kahapon sang Lunes, Oktubre 16.

Ginkilala ang biktima kay John Vergil Rasgo, 25-anyos, residente sang Brgy. Old Buswang, Kalibo, Aklan apang temporaryo nga nagatiner sa Brgy. Balijuagan, Roxas City.

Sa interview sang Brigada News FM Roxas City sa biktima, iya ginpahayag nga naghalin siya sa Teodororo Arcenas Trade Center (TATC) matapos nagkuha sang collection sa iya mga customer, magapauli na kuntani ini sa ila Bodega sa Brgy. Balijuagan agud magpangsweldo sa iya mga kaupdanan.

Pag-abot sa national highway sang Brgy. Dinginan, hinali lang may nag-overtake sa iya nga TMX nga motorsiklo kag nagpundo kun sa diin nagdulog man ang biktima kag ginapahayag  may nagdikit sa iya nga isa pa ka Bajaj nga motorsiklo nga may sakay nga duha ka lalaki kag gintutukan siya sang Caliber. 38 nga armas-luthang kag nagdeklarar sang hold-up.

Suno pa diri, natigayon nga makuha sang mga suspetsado ang duha niya ka bag nga naga-unod sang kwarta lakip ang yabi sang iya motorsiklo kag madasig nga nagpalagyo.

Maswerte man suno diri nga wala makuha ang iya cellphone, rason nga nagpanawag ini gilayon sa iya mga kaupdanan agud mangayo sang bulig sa mga kapulisan agud ipabalhag ang natabo.

Sa karon, padayon pa ang imbestigasyon sang mga kapulisan sa natabo nga insidente. | Judy Ann Juare

Leave a Reply

Your email address will not be published. Required fields are marked *