AVAILABLE na sa General Santos City pinaagi sa Philippine Red Cross (PRC) ang ‘saliva test’ ang barato nga alternatibo sa RT-PCT swab tests.
Matud ni Merly Gludo, administrator sa PRC-GenSan chapter mahimong makig-alayon kanila ang buot mopailawom sa test.
Naa lang sa P2, 000 ang presyo sa ‘saliva test’ apan sa karon kinahanglang modugang og P500.00.
Tungod ipadala pa nila ang ‘laway’ ngadto sa laboratoryo sa Cagayan De Oro City gumikan wala pa’y susamang laboratory sa dakbayan.
Luyo niini, barato gihapon ang ‘saliva test’ tandi sa swab test nga nagdula sa P3, 800 hangtud P5, 000 ang charged.
Paspas sumala pa ang pag-abot sa resulta, luwas ug dili sakit ang proseso sama sa swab test.
Gikaengon ni Dr. Rochelle Oco, incident commander sa City- Inter Agency Task Force on Covid- 19 (CIATF) dako og tabang ang ‘test’ aron gilayong masuta ang mga dunay Covid-19 bisan paman katong mga walay nasinatiang sintomas.
Ang ‘test’ ang ginagamit usab sa mga ‘travelers’ sa pagsulod sa mga lugar sama sa GenSan nga rekisitos ang RT-PCR test negative result. ( Rich Gubalani)