Santacruzan sa katapusan nga adlaw sang Capiztahan 2023

Nagtipon kag nag-isa agud maghatag sang pagkilala sa Mahal nga Birhen Maria ang syudad sang Roxas kag nagkatuhay nga kabanwahan sa probinsya sang Capiz sa ginpatigayon nga Santacruzan sa Capiztahanan 2023 sa Capiz Villareal Stadium.

Ini ang ginsuguran sang Holy Mass sa Metropolitan Cathedral nga gin atenderan sang mga opisyales kag empleyado sang LGU’s, Capiz Provincial Government kag mga Reina sang Santacruzan subong man sang ila pamilya, kaabyanan kag iban pa.

Ginsundan sang prosisyon padulong sa Villareal Stadium kon sa diin ginhiwat ang pagpasidungog kay Maria nga ginpangunahan ni Ms. Ina Beatrice B. Malapajo bilang Reina Elena 2023.

Ginpasalamatan kag gin abi-abi man ni Gov. Fredenil Castro ang tanan nga nagtambong kag nagsuporta sa Capiztahanan 2023 subong man ang pamilya sang mga nagsagalas kag komitiba sang Santa Cruzan bangud suno sa iya indi mangin madinalag-on ang ini nga selebrasyon kon indi tungod sa mga nagasuporta.

Gindugang pa sini nga ang Capiztahanan 2023 ang nagsugod sa isa ka Santos nga Misa kag ini ang gintapos pinaagi sa Santacruzan.

Nangin dinapit man nga bisita sa Santacruzan ang kaparian sang Archdiocese of Capiz nga ginpangunahan ni Monsignor Fredie Billanes, Sangguniang Panlalawigan members nga ginapamunuan ni Vice Governor Mitang Magbanua kag mga alkalde sa bug-os nga probinsya.