LEGAZPI CITY – Dae uyon an saro sa mga retailers ki bagas sa Legazpi City Public Market, sa ipinautob na price ceiling kun sain makawat sana sa PHP41 hasta PHP45 an presyo kan kada kilo ki bagas na nagin epektibo kan Setyembre 5.
Ini sa irarom kan rekomendasyon na inaprubahan ni Presidente Ferdinand “Bongbong” Marcos, Jr. sa lindong kan Executive Order No. 39.
Segun kay alyas “Philip”, nabakal ninda an bagas sa halangkaw na presyo, alagad papano ninda ngunyan ini ipapabakal sa hababa na kantidad.
Dakulaon kaya su boot an posibilidad na malugi sinda digdi, kun sain dipisil orog na ta igwa man ki pamilyang pigpapakakan bate ini man sana an solamenteng source of income kan kadaklan sa sainda.
Sinabi niya, an pokusan dapat kan gobyerno iyo an mga darakulang supplier asin bako sindang saradit na retailer.
Wara man kaya su boot saindang problema kun ipapabakal ninda an mga bagas sa hababa na kantidad, alagad dapat hababa man an presyo sainda kan mga supplier.
Dugang pa kaini, kaya nindang babaan an saindang presyo kun igwa na sindang makaputan na kwarta o ayuda siring kan itinuga sainda kan gobyerno.