KALIBO, AKLAN—Nagakabaeaka do Sangguniang Bayan Kalibo sa padayon nga pagsaka it kaso it coronavirus disease 2019 (COVID-19) sa kabisera it Aklan.
Sa regular session it SB Kalibo, ginpahayag ni SB Member Ketchie Luces, Chairman it Committee on Health nga do ulihi nga pueong it Municipal Inter-Agency Task Force hay ku buean pa it Enero ukon Pebrero ngani nga kinahangean nga masayuran kung ano do ginaobra nga tikang it task force agud nga indi eon mag-inabo do kaso it deadly virus sa Kalibo.
Sa makarun sigon hay may una eon nga kabilugan nga 635 cases do banwa it Kalibo, 22 do binawian it kabuhi ag nagaabot pa sa 73 do aktibong kaso.
Suno man kay SB Member Buen Joy Villanueva-French, kinahangean nga istoryahan do nasambit nga problema agud nga indi matuead sa ibang lugar nga maabo do pasyente apang owa eon it butangan sa mga raya.
Ginpahayag man nanday SB Members Agusto Tolentino ag Philip Quimpo nga do MIATF ru dapat nga magpanguna sa tanan ag siguraduhon nga una sa gihapon do disiplina sa publiko eabi eon sa pagsunod sa mga health protocols, pagmonitor sa COVID-19 cases ag do pagpabakuna sa mga Kalibonhons.
Samtang, nakataeana man nga imbitahan do head it Municipal IATF, MHO Kalibo, ag hepe it Kalibo MPS sa masunod nga session agud nga istoryahan do nahanungod sa nasambit nga butang. // SHERRY ANNE REUNIR-VIDAL