Seklista nga naligsan-patay, wala pa nailhi

Wala pa gihapoy tagtungod o nakaila sa siklesta nga naligsan-patay sa Mc Arthur Highway, Matina Crossing ning syudad pasado alas 5:00 sa buntag, Enero 10, 2024.

Gibutyag ni Davao City Police Office PCapt. Hazel Tuazon nga wala pa gihapon nailhan ang maong biktima gumikan maayong pagkaguba sa panagway niini human sa disgrasya.

Kahinumdoman nga gisubay sa dump truck nga gimaneho sa usa ka Dino Ugos Mejares Jr., 34 anyos, nga residente sa Purok 3, Lubogan, Toril, Davao City ang Mc Arthur Highway padulong sa Matina Crossing intersection.

Pag-abot sa diin nahitabo ang insedente, nabanggan niini ang bicycle rider nga mitabok gikan sa wala nga bahin ug padulong sa tuo nga bahin sa susamang direksiyon.

Gumikan sa impak, nakaangkon og grabeng injury ang maong  biktima nga miresulta sa iyang hinanaling kamatayon.