GIKOMPIRMA sa usa ka sekyu sa Camella Ceritos Subdivision nga kanunay nang nagabisita si Jazdel Gabayeron sa lugar sa iyang classmate sa Purok Malipayon, Barangay San Isidro aron maghimo og mga activities sa eskwelahan. Kung asa sa nahisgotang lugar usab kini nakit-ang patay human sa unom ka adlaw nga pagka-missing.
Matud sa sekyu nga si Alyas Jun-jun dili niini tinuod nga pangalan ginahatod si Jazdel sa iyang amahan kung moadto kini sa nahisgotang lugar, unya sugaton usab kini sa gate sa subdivision kung mopauli na sa ilang balay sa Purok 13, Carcon Village, Barangay Lagao.
Gibana-bana sa sekyu gikan sa maong subdivision nga 50 metros ang gilay-on sa bakanteng lote asa nakit-an si Jazdel nga naghayang sulod sa CR anaa na sa state of decomposition suot ang uniporme sa SPED Integrated School asa kini mitungha sa Grade-10 Liquit.
Pipila ka adlaw ang milabay bag-o nakaplagan ang batan-ong babaye nakatimaho ang sekyu og baho duol sa lugar nga iyang ginapalitan og sud-an, apan wala niini gipanumbaling ang iyang nasimhotan tungod sa pamasin nga posibleng hayop ang nalata sa kanal.
Una nang nakita sa mga bata nga nakaadto sa lugar ang kamot sa babaye nga migimaw ug nakompirma nga patayng lawas sa tawo ang naa sulod sa CR.
Sa karon naa sa pampublikong punerarya gidala ang patayng lawas sa estudyante samtang nagpadayon pa ang imbestigasyon sa San Isidro Police Station kalabutan sa nahitabo. I Enamie Mogpon