Senior Citizen na may karamdaman, ninakawan sa Quezon, Palawan; ang insidente, sapul sa CCTV

Sapul sa CCTV camera ang pagnanakaw ng umano’y mag-asawa sa isang bag at karton na may lamang gamot at mga pagkain sa Quezon Public Market nitong Huwebes, February 9, 2023.

Ang bag at karton ay inilagay lamang sa isang tricycle (topdown) at pagmamay-ari ito ng isang senior citizen.

Ayon kay Vincent Gajisan, anak ng biktima, nangyari ang pagnanakaw kung saan iniwan lamang sandali ng kanyang magulang ang gamit para sana bumili ng ibang kailangan.

Pagbalik niya sa sasakyan ay wala na doon ang pinamili na aabot ang halaga sa tatlong libong piso dahil ninakaw na pala ito ng mag-asawang agad na sumakay sa isa ring topdown.

Hinabol pa umano ang mag-asawang suspek subalit hindi ito inabutan sa ibang barangay.

Samantala, ang pinambili sa mga gamot at iba pang pangangailangan ay ang pensyon ng kanyang ina na mayroong sakit.

Ang insidente at footage ay inireport na sa Quezon PNP na patuloy nilang iniimbestigahan.

Leave a Reply

Your email address will not be published. Required fields are marked *