Nagapabilin sa pribado nga ospital ang isa ka senior citizen matapos nakuryente sa Narra Street, Brgy. Punta Tabuc, Roxas City.
Ginkilala ang biktima kay Jose Dile, 61-anyos, residente sang nasambit nga lugar.
Sandig sa Roxas Component City Police Station, takna alas 10:30 kahapon sang Huwebes nagpanawag sa ila istasyon si Joel Bautista, 57-anyos, lineman sang Capelco kag residente sang Brgy. Salocon, Panitan agud i-report ang amo nga hitabo.
Ginapahayag nga samtang nagasaka kag nagapanungit sang Camansi ang biktima gamit ang fruit picker wala sini matalupangdan ang primary line sang kuryente kag ini ang iya natandog.
Nahulog ang biktima kag nag-angkon sang pilas sa tiil kag butkon tuga sang pagkakuryente.
Madasig naman ini nga ginpadangat sa Capiz Emmanuel Hospital para sa nagakaigo nga pagbulong.