Sim card registration sa City Hall, mi-arangkada na

Bisan og gideklarar nga holiday karong adlawa, Biyernes, gipadayon sa National Telecommunication Commission kon NTC, kauban ang duha ka providers nga Globe ug Smart, ang sim card registration assistance sa ground floor sa Ormoc City Hall.

Alas 8 karong buntag nanawat sila og mga subscribers nga buot magparehistro sa ilang mga sim cards.

Sa pakighinabi sa Brigada News FM Ormoc kang Engr. Alita Contreras, OIC Chief Enforcement and Operation Division kini mitug-an nga sa unang pipila ka minuto nakasinati sila og hinay nga signal gamit lang ang data sa pagrehistro.

Giklaro niini nga igo lang mo-assist ang NTC kay ang mga nahisgutang providers ang moperehistro sa ilang mga subscribers.

Sa pagsuwat niining balita, pasado alas 9 karong buntag, wa pa kaabot sa 10 ka mga subscribers ang nakaparehistro.

Gipahibawo ni Engr. Contreras nga andam sila moserbisyo hangtud alas 5 sa hapon karong adlawa.

Gipasabot usab niya nga way limit sa usa ka subscriber ang iparehistro nga sim cards. Kung usa ka menor de edad, iparehistro kini ilawm sa pangan sa ginikanan o kaha sa guardian nga gikinahanglang mokuyog sa pagparehistro.

Sa rehistrasyon karong adlawa, gawas sa cellphone ug sim card, magda og valid government issued nga ID ang usa ka subscriber. Kung keypad ang cellphone, dad-on usab kini kay mamahimo ra usab marehistro ang sim card niini. | via Jim Yango Fantonial

Leave a Reply

Your email address will not be published. Required fields are marked *