SITG dunay development sa Sapie Double Murder Case

Natumbok na sa otoridad ang armas nga gigamit sa pagpatay sa magtiayong Atty. Sitti Gilda Mahinay-Sapie ug Muhaimin Mohammed Sapie, kini nunot sa natigayong unang case conference niadtong Miyerkules (Hulyo 21, 2021).

Gawas niini gibutyag ni Davao City Police Office (DCPO) City Director Pol. Col. Kirby John Kraft, nga hawid na karon sa Special Investigation Task Group ang resulta sa awtopsiya sa patay’ng lawas ni Atty. Sapie ug post mortem examination sa bana niining si Timmy Sapie human gipresenta sa Regional Crime Laboratory Office-XI.

Apan nagdumili una sa paghatag og dugang detalye ang opisyal kalabot sa impormasyon sa matang sa armas nag gigamit sa gunman sa pagpusil sa magtiayon.

Luyo niini, gikumpirma usab ni Kraft nga usa sa gitutukan sa SITG nga posibleng dunay dakong kalambigitan sa krimen mao ang dakong bangi sa yuta nga gituki sa magtiayon ug ang bilil tali sa Board of Directors (BOD) sa subdivision nga ilang gipuy-an.

Kahibaluang ang maong mga isyu ang kanunay unod sa ulahing mga pag-broadcast sa magtiayon kung diin duna pay gipangalan nga mga personalidad nga nanghulga kanila ayha sila gipamusil.

Ang nasangpit nga development anaa pa lamang sa elimination process ug sa musunod nga semana takda nga magpulong pagbalik ang SITG alang sa weekly case conference sa kaso. BNFM-DAVAO

Leave a Reply

Your email address will not be published.