So.Cot, naghahanda na sa El Niño

KORONADAL CITY- PINAGHAHANDAAN na ng probinsya ng South Cotabato ang posibleng pagtama ng El Niño sa susunod na mga buwan.

Inihayag ni Provincial Disaster Risk Reduction and Management Office o PDRRMO OIC Rolly Aquino na batay sa forecast ng Pag-asa, nasa 80 % ang probability ng pagtama ng El Niño sa buwan ng Hunyo, Hulyo at Agosto na posibleng magtagal hanggang sa 1st quarter ng 2024.

Kamakailan lamang, nakipagpulong na ang PDRRMO kasama ang iba’t ibang departamento katulad ng Office of the Provincial Agriculturist (OPAg), Provincial Veterinary Office (PVet), Integrated Provincial Health Office, National Irrigation Administration (NIA), DILG, PNP at AFP kung saan tinalakay ng mga ito ang posibleng epekto ng tag-init sa mga pananim, mga hayop, at mga tao at ang mga mitigating measures na maaring ipatupad ng provincial government.

Sa ngayon, hinihintay pa ng PDRRMO ang mga proposals ng naturang mga tanggapan upang mapondohan at maaprubahan ng konseho.

Pinasiguro naman ni Aquino na handa ang lalawigan sa pagresponde at pagbibigay ng tulong sa mga maaapektuhan ng El Niño phenomenon.

Leave a Reply

Your email address will not be published. Required fields are marked *