SP GenSan tukion ang resolusyon nga gakontra sa open pit mining sa South Cotabato

SUPAK si Kagawad Atty. Jose Edmar Yumang sa open pit mining sa Tampakan, South Cotabato hinungdan nga sa session, iduso niini ang resolusyon nga gakontra sa maong pagmina.

Gihingusgan ni Yumang nga apektado ang GenSan isip low land area kung ugaling mahitabo ang open pit mining tungod bisan karon nga hinay lang ang pag-ulan, mobaha gilayun ang Silway river.

Gawas niini, may water scarcity na ang GenSan niadto pang 2015 subay sa pagtuon sa USAID hinungdan nga samot magkaproblema ang syudad sa suplay sa tubig ugaling mahitabo ang open pit mining.

Ang gihimong pagkontra matud pa sa maong pagmina ang alang sa umaabot nga henerasyon ug mas bug-at ang epekto sa kinaiyahan niini itandi sa mahatag nga benepisyo sa ekonomiya nga temporaryo lamang usab.

Karong adlawa, Mayo 24 tukion sa session ang resolusyon ni Yumang ug masayran kung kinsa ang mga mopabor niini o mokontra samtang gitino nga wala pa siyay sunod nga lakang kalabot sa maong hisgutanan.

Samtang giimbitahan usab ang mga stakeholders, taga simbahan, eksperto sa pagmina ug bisan ang SMI nga maoy mining company nga planong magpahigayon og open pit mining sa Tampakan.

Hinuon una nang gibutyag ni Yumang nga makaupat ka beses na nila gipadalhan og imbitasyon ang SMI aron mohatag og pamahayag sa konseho kalabot sa open pit mining, apan wala matud pa silay nadawat nga tubag.

Leave a Reply

Your email address will not be published.