SSS nagpasiguro nga gukdon ang negosyante nga galikay sa kontribusyon sa ilang trabahante

NAGPAGAWAS og katin-awan si Noel Nacion, Senior Analyst sa Social Security System (SSS) Gensan branch nga padayon ang ilang mga lakang batok  sa mga agalon nga wala nagaremit og ilang kontribusyon sa ahensya.

Kini ang giluwatan ni Nacion pagkahuman nga dili pa lamang dugay nagpahigayon ang ilang buhatan og Run After Contribution Evaders (RACE) batok sa 11 nga dunay negosyo aron nga ipasabot ang ilang obligasyon ngadto sa ilang mga empleyado nga nakalatid sa balaod.

Gipaklaro ni Nacion nga tumong sa ilang lakang ang pagpakigbisog sa katungod sa mga trabahante nga kinahanglan makaangkon sila og kontribusyon ug dili ang aron nga pakaulawan ang negosyante nga ilang ginaadtoan.

Saysay pa niini nga sa South Mindanao 2 mikabat sa kapin 500 na nga mga kaso ang anaa karon sa ilang legal department ug uban niini ang mihinay-hinay na og bayad sa ilang kontribusyon.

Segon ni Nacion nga sakop sa South Mindanao 2 ang SSS Gensan, Koronadal, Tacurong ug Kidapawan. I Danny Casi