PADAYUN gihapon ang pagdawat sa St.Elizabeth Hospital og pasyente ug gina-deduct gihapon sa ilang bayrunon ang PhilHealth.
Kini ang gibutyag ni Chief operating officer sa St. Elizabeth Hospital, Antonio Veneracion human usab ginahulat ang ilang claims sa PhilHealth kung mabayran na subay sa gipasalig kanila nga bag-o matapos ang kasamtangang bulan sa Oktubre ning tuiga.
Sa karon matud pa ginahulat unsa ang update sa gipasalig sa PhilHealth luyo nga aminado nga nagkalisod na sila sa ilang operasyon.
Giangkon niini nga mipasalig ang PhilHealth nga bayran ang kapin 70 percent sa mga claims sa mga ospital sa syudad asa sa sumada sa ilang grupo, mokabat sa P834 million ang bayrunon kanila.
Una nang gibutyag ni Veneracion nga sa ilang libuan ka COVID-19 claims sa PhilHealth, pito pa lang ang nabayran samtang ang uban ang mga non COVID-19 claims.
Gibutyag usab sa PhilHealth nga ilang susihon ang record sa mga ospital aron ma-reconcile ang discrepancy sa kantidad nga gina-claim sa mga ospital ngadto kanila.
Una na nagpagawas og statement ang Philippine Hospital Association sa GenSan sa planong pag-disengage sa PhilHealth ugaling dili dunggon ang ilang hangyo nga mabayran sa ilang claims.