LEGAZPI CITY – Pigklaro kan Santa Clara Shipping Corporation na dai man makakaraot sa kapalibutan asin kadagatang sakop kan Brgy. Mapulang Daga sa Bacacay, Albay an plano nindang pagbugtak ninda nin dockyard facility.
Segun kay Atty. Avelino Sales Jr., kan legal department kan nasambit na korporasyon, an planong pagbugtak nin facility dai man makakaraot sa coral reefs.
Sa ginibong presentation kan Bureau of Fisheries and Aquatic Resources (BFAR) sa committee meeting kasuudma, haros dakol su boot an maapektarang coral reefs, seaweeds, mga sira asin bakawan.
Nalinawan an mga myembros kan SB siring man an iba pang imbitado na wara nin magigin distroso sa pagbubugtak nin dockyard facility.
Dugang pa kaini, dakulaon na opurtunidad an pagkakaigwa kaini huli ta magkakaigwa nin trabaho an mga namamanwaan.
Nagpaliwanag man an nagkapirang mga konsehal kun nata nagboto sa planong pagbugtak kaini nin huli ta sa primerong pagdangog, magayon an obheto kan korporasyon.
Alagad, may konsehal man na dae nagboto huli ta igwa su boot ki mga maaapektaran.
Piglalaoman sa masunod na regular session na liwat na magkakaigwa nin botohan an mga miyembros kan SB kun ini tutugutan o bawion na sana an ‘no objetion’ sa pagbugtak nin dockyard facility.