Sambilog ka 14-anyos nga sultireto ro nagreklamo bangud segun sa pagpanakit it daywa ka kapulisan sa Barangay 1(uno), San Jose, Antique ku Oktubre 8 it gab-i.
Base sa biktima nga ginkieaea eamang bilang alyas Toto, nagabagtas raya pauli kat gintawag imaw it mga kapulisan nga nag-roving sakay ro patrol car.
Ginsugo ni Police Staff Sergeant John Paul Tabalanza ag Police Corporal John Alfred Salvador ro sultireto nga ibutang ro alima sa anang ueo ag ginpasakay sa patrol car. Ginkapkapan si Toto it mga pulis ag na-recover sa ana ro sambilog ka kutsilyo.
Nakibot eamang ro sultireto kat ginbayo imaw it sambilog ka pulis sa itsura gamit ro handle it kutsilyo.
Gin-ako man ni Toto nga naka-inom imaw sa mga oras nga nakit-an raya it mga pulis pero nakipag-kooperasyon man imaw sa anda.
Bangud sa natabo, nagpalagiw si Toto sa patrol car kat nakatiempo nga masako ro mga kapulisan sa ginrespondehan nga inaway sa lugar.
Desidido man nga pagsakaan it kaso ni Toto ro daywa ka pulis nga nagpanakit sa ana.
Dugang pa nana, ro akto nga pagpanakit hay nabuean it CCTV footage it Barangay 1 (uno)./JIL B. LACSON