Nagapanghakroy naman ang mga consumer matapos nga nagtaas ang presyo sang karne sang baboy sa merkado bangud man sa kakulang sang suplay sini sa probinsya sang Capiz.
Sa interview sang Brigada News FM Roxas City kay Kapitan Roberto “Ma-aw” Roldan, presidente sang meat section sa Teodoro Arcenas Trade Center, ginpahayag sini nga bangud sa kakulang sang suplay sang baboy sa Capiz napilitan sila nga magpangbakal sa mga kaiping nga probinsya kag ini ang rason kun ngaman nagtaas ang presyo sang karne sa merkado.
Suno kay Roldan, malaka nalang ang nagahupot sang baboy sa palibot sang syudad kag sa mga kabanwahan bangud man sa makaduludla nga pag-igo sang African Swine Fever (ASF) nga nagdala sang dako nga kapierdihan sa mga manugbaboy.
Gintuad man sini nga may yara sang nagakaigo nga dokumento ang pagbakal kag pagpasulod nila sang baboy sa probinsya.
Nahibaluan nga nagdangat na sa P300 tubtob P320 ang kada kilo sang karne sang baboy sa merkado kag posible pa nga magtaas ini sa maabot nga bulan sang Disyembre.
Nagapangabay man si Roldan sa mga bumalakal nga intindihon nalang ang pagtaas sang presyo sang karne bangud malayo pa ang ila ginakuhaan sang suplay kag mahal man ang pagbaligya sa ila. | Judy Ann Juare