PATAY ang usa ka supporter sa Dawlah Islamiya kun Daesh group human misukol sa kapulisan atol sa pag-implementa og search warrant sa Purok 1, Brgy. Koronadal Proper, Polomolok, South Cotabato Mayo 21, alas-7 sa buntag.
Giila ang napusilan patay nga si Abdula Lido Dala, 47-anyos, minyo ug kasamtangang nagpuyo sa Prk 1, Brgy. Koronadal Proper sa nasangpit nga municipyo.
Base sa gipadala nga report ni Plt./Col. Alex Joe Orcajada, hepe sa Polomolok Municipal Police Station sa Brigada, ang unod sa search warrant ang kalapasan ni Dala sa RA 9165 nga giisyu ni Hon. Adelbert Santillan sa Branch 63 Regional Trial Court, Polomolok, South Cotabato.
Dihang miabot ang grupo sa kapulisan sa lugar, namatikdan matud pa ni Dala ang presensiya sa kaulisan ug mibunot sa iyang armas apan naunhan kini sa kapulisan hinungdan nga napusilan ang supporter sa Dawlah Islamiya ug namatay.
Nakuha sa SOCO team gikan kang Dala ang usa ka flag sa ISIS, usa ka unit sa cal 357, duha ka 9mm, 12 sachets sa suspected shabu ug shabu paraphernalias.