Nagsugod na kahapon nga adlaw sang Huwebes, Agosto 24 ang ginpatigayon nga surgical mission sa Roxas Memorial Provincial Hospital nga gintig-uluhan “KABUHI MO, GUGMA KO, ANG IKAAYONG LAWAS MO, KALIPAY KO!” nga isa sa programa kag inisyatibo ni Governor Fredenil Castro agud mabuligan ang mga kubos nga Capisnon kag wala sang ikasarang sa pagpa-opera.
Sa interview sang Brigada News FM Roxas City kay Dr. Florencio Luching- RMPH Chief of Hospital, iya ginpahayag nga nangin madinalag-on ang una nga adlaw sang surgical mission sa pagpanguna sang mga doktor gikan St. Luke’s Medical Center- Global City kun sa diin 18 ka major operations kag 14 ka minor operations ang natapos.
Suno kay Luching, madamo sang Capisnon ang nagapila sa guwa sang operating room sang nasambit nga ospital agud maka-avail sang libre nga pagpaopera.
Dugang pa sini, 50 lang kuntani ang target sang sini nga surgical mission apang bangud sa madamo ang nagpalista nagdangat na sa 86 ang mga benepisyaryo para sa major operations kag yara naman sa 70 tubtob 110 ang nagpalista para sa minor operations.
Aminado man si Luching nga madamo pa sang mga wala nadala sa listahan bangud indi na masarangan sang mga doktor gikan sa St. Luke’s nga matapos sa tatlo ka adlaw (Agosto 24 tubtob 26, 2023).
Nagpasalamat man ang pinuno sang RMPH kay Gov. Castro sa maayo sini nga programa bangud nakabulig gid sang dako sa mga pumuluyo sa probinsya kag nagapasalamat man ini sa mga doktor sang St. Luke’s Medical Center nga wala nagpangduha-duha nga magpadulong sa Capiz para sa amo nga surgical mission. | Judy Ann Juare