PATAY ang usa ka drug suspek human misukol sa kapulisan atol sa pagrespondi sa Purok 6A, Baranagy Los Amigos, Tugbok District, ning syudad, alas-12:19 sa hapon, kagahapon, Nobyembre 20, 2023.
Ang suspek nailang si Ronaldo Saludo Tan, 43, ug residente sa Purok 13, Barangay Manuel Guianga, Tugbok.
Una niini, dunay nanawag og police assistance human nga ang suspek nagbahas-bahasa sa maong lugar bitbit ang armas.
Paspas hinoon nga girespondihan sa kapulisan ang maong lugar ug naabtan ang maong lalaki nga bitbit pa ang 38. Caliber revolver.
Sa dihang nagpaila ang kapulisan ngadto sa suspek, inay nga mutahan sa iyang kaugalingon, gipusil hinoon sa ikatulong higayon ang mga pulis ug isip depensa nibalos ang otoridad hinungdan sa pagka-igo niini.
Gisulayan pa sa pagdala sa ospital ang suspek apan gideklarang patay sa iyang attending physician Dr. Abraham Magbanua.
Narekober sa crime scene ang usa ka cartridge case sa caliber .9mm., usa ka unit sa caliber .38 revolver nga dunay tulo ka mga bala, usa ka tactical pouch nga giundan sa upat kabook nga transparent plastic sachet nga dunay unod nga pinaugang dahoon sa marijuana, disposable lighter, ug ID.
Ang nakuhang “MARIJUANA” mutimbang sa kapin kon kulang 36.663 grams nga dunay Standard Drug Price nga Php. 4,000.
Nasayran nga ang suspek dunay pending nga kasong kriminal sa Davao City Prosecutors Office gumikan sa 3 counts of rape ug 2 counts sa Statutory Rape ug nasayran nga gibiktima sab sumala pa niini ang iyang duha ka mga anak nga babae.
Gihikay na ang dugang kaso sa suspek samtang anaa na gikustodiya sa Los Amigos Police Station.