Ginhilway na sa kustodiya sang kapulisan ang ginatudlo suspek sa pagpangawat nga nagluntad sa Barangay Pangabuan, Jamindan, Capiz matapos nga nagtakup na ang reglementary period of detention sini.
Ginkilala ang suspek kay Ernesto Dasal Inaudito, 40-anyos residente sang nasambit nga lugar.
Matandaan, nga samtang nagapanglaba sa guwa sang iya balay ang biktima nga si Norma Hinalan, hinali nalang nag-abot ang suspek kag gintanyagan siya sang itlog nga ginabaligya sini, nagsabat ang biktima nga indi apang nagapamilit ang suspek nga baklan siya.
Ginapahayag nga ginhatagan sang biktima ang suspek sang P100 kag ginsilingan nga maglakat na kag indi na siya pag-isturbuhon.
Nakaligad ang pila ka minutos, nakatapos na panglaba ang biktima, iya nabatyagan nga may yara sang tawo sa sulod sang iya balay, madasig niya ini nga gintsekyar kag nakita niya ang iya bag nga nagaduag itom nga bukas na kag wala na ang iya kwarta nga nagabalor sang P15,000.
Bangud sini, madasig siya nagpadulong sa likod nga porsyon sang iya balay kag didto niya nakita si Inaudito nga nagalakat sa uyapad kag nagpalagyo sa indi mahibaluan nga direksiyon.
Nagpatigayon sang hot pursuit operation ang mga kapulisan kag natigayon nga madakpan ang suspek pinaagi man sa bulig sang mga Barangay Officials kag Barangay Tanod.
Narekober sa posisyon kag paghinakop ni Inaudito ang nabilin nga P6,100.
Sa karon, natalana ini nga pasakaan sang nagakaigo nga kaso pinaagi sa regular filing. | Judy Ann Juare