Suspek sa pagpatay kang Freya Joy Cuevas, gipangita na sa kapulisan

Gipangita na karun sa General Santos City Police Office ang gitudlong suspek sa pagpusil-patay kang Freya Joy Cuevas, 27-anyos, negosyante, residente sa Barangay Apopong, Gensan.

Sa interview kang Police Major Patrich Elma, hepe sa Makar Police Station, gibutyag niini nga miaging semana pa migawas ang warrant of arrest batok kang Ross Kim Garcia, suspek sa pagpusil-patay kang Cuevas.

Gikumpirma usab ni P/Maj. Elma nga si Ross Kim anak ni Development Bank of the Philippines (DBP) board of  director Atty. Rogelio “Bic Bic” Garcia.

Kahinumduman nga gipusil-patay si Cuevas atong Disyembre 3, 2020 sa gabii sa Purok 7, New Society, Barangay Apopong.

Base sa affidavit sa kapulisan, daan nang dunay bahad sa kinabuhi ang biktima gikan kang Ross Kim nga naabot pa sa barangay human kining gi-harass sa suspetsado.

Si Freya ug ang misis ni Ross Kim nga si Caressa ang magka-sosyo matod pa sa negosyo ug didto na nagpuyo sa balay sa biktima ang iyang asawa.

Sigun ni P/Major Elma, giadtuan na nila ang balay ni Ross Kim sa may Block 3, City Heights apan wala na didto hinungdan nga nagpahigayon na sila og manhunt operation alang sa pagsikop sa suspetsado.

Wala una mitubag si Rogelio, amahan sa gitudlong suspek kalabot sa gikalambigitan sa iyang anak samtang ang pamilya sa biktima dako ang pasalamat nga migawas na ang warrant of arrest batok sa suspek.

Leave a Reply

Your email address will not be published. Required fields are marked *