Syrup at liquid medicine para sa ubo ban muna sa Indonesia matapos masawi ang 100 mga bata

Ipinagbawal na ng Indonesia ang pagbebenta ng lahat ng syrup at liquid medicine para sa ubo kasunod ng pagkamatay ng halos 100 mga bata at ang hindi maipaliwanag na pagtaas ng kaso ng acute kidney injuries.

Ayon sa Health Ministry ng Indonesia, ang pagbabawal sa pagbebenta ng cough syrup ay mananatili hanggang hindi natatapos ang imbestigasyon sa unregistered medical syrups na pinaniniwalaang mayroong toxic ingredients.

Sinabi ni Health Ministry Spokesman Mohammad Syahril na nagpapatuloy ngayon ang imbestigasyon nila sa pagkamatay ng 99 na mga bata at 206 na kaso ng acute kidney injuries sa mga batang nasa edad 6 pababa.

Una nito ay inihayag ng World Health Organization na pinaghihinalaan nilang mayroong hindi naaaayon na chemical content ang mga cough syrup na gawa ng Maiden Pharmaceuticals Limited, Promethazine oral solution, Kofexmalin baby cough syrup, Makoff baby cough syrup at Magrip N cold syrum.

Maaari umanong makapinsala sa utak, baga, atay at kidney ang mga makakainom ng hindi pa matukoy na kemikal.

Leave a Reply

Your email address will not be published. Required fields are marked *