Tatlong pulis sa Jaro, Iloilo, nagbulig sa pagpa-unga sa babayeng may deperensya sa paino-ino

KALIBO, AKLAN—Owa nagduha-duha nga magbulig do tatlong pulis sa Jaro, Iloilo City sa babayeng naga-unga ku June 27, 2021.

Ginkilaea do mga raya nga sanday Patrolman Vinjie Nebit, Patrolman Roman Paja ag Patrolman Rico Yan Inocencio.

Nasayuran nga samtang nagapatrolya do nasambit nga mga pulis sa sueod it Jaro plaza hay nagpangayo kanda it bulig do babaye nga nakilaea kay Ma. Cecilia Cesima, 27 anyos nga naga-labor eon ag sa bulig it mga raya hay maayos nga naipaguwa kara do healthy baby girl.

Matapos nga maka-unga hay insigida nga gindaea do mag-ina sa West Visayas State University hospital agud nga mataw-an it nagakaigo nga atensyon medical.

Do mga pulis, mag-eowas sa nagtao it bugas, diaper, gatas ag iba pang kinahangeanon it nanay ag eapsag hay sanda man do nagserbeng bantay sa ospital it mag-ina.

Nasayuran nga do nasambit nga babaye hay kilaeang may deperensya sa paino-ino ag pirmi sigon nga nagawinarang-warang sa Jaro plaza ag sa makarun hay una eon sa paghinakop ag padayon nga gina-monitor it CSWDO Jaro district. // SHERRY ANNE REUNIR-VIDAL

Leave a Reply

Your email address will not be published. Required fields are marked *