Term sharing agreement sa Liga ng Barangay sa GenSan gihisgutan

NANGHINAUT karon si Atty.Jeng Gacal, Special Assistant to the Mayor nga mausab pa ang panghuna huna ni Brgy. Lagao Kapitan Rolito Blando, isip presidente sa Liga ng mga Barangay sa GenSan.

Kini may kalabutan sa term sharing agreement tali kang Brgy.Apopong Kapitan Paolo Natividad sa paglingkod sa Sangguniang Panlungsod isip ex officio member.

Segun ni Gacal, nga mas makaayo alang kang Blando nga mutuman sa gikasabutan luyo nga walay kasulatan sa pagbahin sa termino sa pagsilbing labaw sa Liga ng mga Barangay sa GenSan, tungod pagpakita kini sa usa ka maayong lider nga may palabra de honor.

Una nang gibarugan ni Blando nga wala kini nasayod nga adunay susamang kasabutan ug dili mohawa sa posisyon.

Alang usab kang Kagawad Atty.Jose Edmar Yumang nga dili matud pa subject sa term sharing ang function sa usa ka buhatan ug kinahanglan mag comply sa balaod.

Bisan magkasabot matud pa sila, apan kini ang walay igong basehan ug kung gusto matud pa nga makuha ang maong posisyon, mahimong modangop sa korte.

Gidugang ni Yumang, wala usab matud pa siya masayod nga gitugutan si Kapitan Rock Garay sa partido nga gianiban aron magrepresenta sa maong panagsabot, luyo nga karon, mibalhin na sa administration party.