Subling nagpahinumdomom ang Task Force Davao sa publiko nga mag igmat ug mag alerto ilabi na sa mga pasaherong sakay sa mga pampublikong sakyanan aron malikayan ang planong pag sabwag og kadaot sa mga dautang grupo.
Kini human sa pagbusikad sa usa ka bus sa may Aleosan, North Cotabato nga gikan sa Davao City pasado alas otso sa buntag kagahapong adlawa diin gikatahong 5 ka indibidwal ang samaran ug usa ang patay nga giila nga sila Benjamin Solaiman, 5 anyos, kinsa nakabsan sa kinabuhi samtang padayon nga nagpa-alim sila Masid Benjamin, 25 anyos ; Yushra Solaiman, 3 anyos; Haron Solaiman Jr., 5 pa kabulan; Haron Solaiman Sr., 24 anyos ug Rodolfo R. Castillo, 67 anyos.
Kahinumdoman nga kagahapong adlawa, nagpatuman gilayon og red alert status ang TF Davao sa mga entry checkpoint sa syudad diin gipangrikisa ang tanang mga pribado ug pampublikong sakyanan ilabi na ang mga pasahero.
Tungod niini, nangayo og pagsabot ang mga otoridad sa mga pasahero nga mutamod sa tanang inspeksyon nga ilang ipatuman ilabi na sa mga checkpoints sa syudad isip kabahin sa culture of security aron masiguro nga luwas ug hapsay ang byahe pagawas ug paingon sa dakbayan sa Davao.
