Sikop na sa kapulisan ang gitudlong tirador sa pamilyang Garsola sa Negros Occidental human nakit-an ang presensiya diha sa Bus Terminal, Barangay Bayanihan, Butuan City sa nakalabay’ng hapon.
Hisayran nga upat ka tuig na nga nagtago ang dinakpan human nahimo matod pa ang kremin didto sa Sitio Bulwang, Brgy. Biao, lungsod sa Binalbagan, Negros Occidental adtong Pebrero 2017.
Ang dinakpan nailang si Felizardo Paculanang, 40 anyos, residente sa Brgy. Poblacion, lungsod sa Veruela, Agusan del Sur.
Sumala ni Police Brigadier General Romeo Caramat, Jr., ang Regional Director sa Police Regional Office (PRO) 13, si Paculanang maoy gitudlong nipusil patay kang Larry Garsola ug gika-angol sa anak nga si Sheila Mae Garsola.
Tungod niini, duha ka kaso ang gisang-at batok kaniya nga naglangkob sa kasong murder nga walay piyansa ug Frustrated Murder nga dunay piyansa balor P200,000.
Takdang dalhon ang dinakpan ngadto sa korte aron atubangon ang kaso nga naghulat kaniya.