Pilason ang 55-anyos nga tiyo matapos ginlabo sang iya gumangkon sa Sitio Tumbague, Brgy. Bahit, Panitan, Capiz pasado alas 5:00 sang hapon, Huwebes, Agosto 17.
Ginkilala ang biktima kay Antonio Dequiña Biba Jr., samtang ang suspek amo si Jhitte Biba Villagracia, 26-anyos, lunsay mga residente sang nasambit nga barangay.
Sandig sa imbestigasyon sang Panitan Municipal Police Station, magapadulong kuntani ang suspek sa iya ginlawig nga baka sang nasugat-an sini ang biktima sa kauyaparan nga magapauli na sa ila puluy-an.
Ginkabot nalang ni Villagracia nga hinali siya ginsumbag sang iya tiyo nga si Biba apang wala siya maigo matapos nga nakalikaw kag naghana pa liwat nga magpatupa sang inumol rason nga iya ini ginbalusan sang labo.
Bangud sini, nag-angkon sang pilas sa dughan, abaga, likod kag braso si Biba.
Madasig naman nga nagdalagan si Villagracia padulong sang balay sang ila Barangay Kapitan nga si Analiza Dorado agud mangayo sang bulig.
Nagresponde sa lugar ang MDRRMO-Panitan kag ginpadangat sa Roxas Memorial Provincial Hospital si Biba para sa nagakaigo nga pagbulong.
Boluntaryo naman nga nagsungka sa Panitan PNP si Villagracia matapos ang natabo nga insidente. Nahibaluan nga may daan na nga hiligut-anon ang biktima kag suspek. | Judy Ann Juare