Trabahante sa poultry nga naanod sa baha, nakaplagang patay na

Gipahiluna sa Angel Funeral Homes sa Calinan ning syudad sa Davao ang patay’ng lawas sa lalaki kinsa nakaplagang wala nay kinabuhi sa sapa saPurok 8, Brgy. Gumalang, Baguio District, ning syudad niadtong Dominggo, Nobyembre 19, 2023.

Sa report sa kapulisan, daghanang samad partikular na sa ulo nga bahin sa biktima nga nailang si PEPITO SARTE ARIQUIN, 44, minyo, empleyado sa poultry ug residente sa Purok Star Apple, Brgy. Wines, Baguio District, ug gituohan nga mao kini hinungdan sa hinanaling kamatayon sa biktima.

Una niini, nagpatabang ang asawa sa biktima nga si Jeany Lerias Ariquin, 43 anyos niadtong Nobyembre 18 human nga wala na makauli ang iyang bana.

Saysay pa sa duha ka kaubanan niini sa trabaho, nga Biyernes sa buntag, sakay sila sa motorsiklo nga gimaneho sa biktima ug pag-abot nila sa nag-overflow nga creek gumikan sab aha sa Purok Mangosteen, Barangay Wines, Baguio District, pugsanon nila nga gitabok ang kusog nga bul-og sa tubig, apan nawad-an og kontrol ug naanod kini kauban sa biktima.

Nakaplagan na lamang nga wala nay kinabuhi si Pepito sa mga sakop sa 911 USAR human nga paspas gikasa ang Search and Rescue Operation.