BICOL – GIKAN sa orihinal na trenta y siete, maabot na ngunyan sa sitenta y sais na mga munisipalidad sa Bicol an piglalaoman na mabebenipisyaran kan Additional Financing (AF) project sa irarom kan DSWD KALAHI-CIDSS.
Napag-araman na nag allocate na nin maabot sa labi 720 million pesos na commmunity grant an ahensya para sa dugang na trenta y nueveng mga banwaan.
Kabale digdi an onseng mga banwaan sa Camarines Sur; siyam sa Masbate; walo sa Albay; lima sa Sorsgon asin igwang tig tolo an mga provincial kan Camarines Norte asin Catanduanes.
Segun ki DSWD-Bicol Regional Director Leo Quintilla, an AF project iyo an magamit nin Disaster Response Operations Modality (DROM), na sarong simplified procedure kan programa tanganing maparikas an implementasyon kan mga community-identified projects.
Mismong an mga komunidad an madeterminar sa mga mawot na proyekto na siring kan Cash-for-Work scheme, rehabilitasyon kan mga pampublikong pasilidad o edificio, pagbakal nin PPEs, hygiene kits, cleaning supplies asin iba pa.
Mantang piglalaoman madurar an nasabing proyekto sa laog nin tolong taon na popondohan mismo kan gobyerno asin kan World Bank kun saen an pinakaobheto iyo an matabangan an mga tios na pamilya sa nacion siring man masimbagan an negatibong epekto kan pandemya.