Turistang covid-19 vaccinated posibleng irekumenda na payagang makapasok sa Puerto Princesa.

Malaki ang posibilidad na muling irekumenda sa Inter-Agency Task Force o IATF na payagan ang pagpasok ng mga turista sa Lungsod ng Puerto Princesa pero kailangan na ang mga ito ay fully vaccinated laban sa COVID-19.

Ayon kay City Administrator Atty. Arnel Pedrosa, hiniling na niya ito dati sa IATF na bukod sa bakunado ang turista ay kailangan din na negative sa RT-PCR pagdating at isailalim sa Antigen test sa lungsod at kung negative pa rin ang resulta ay saka pa lamang papayagan na tuluyang makapasok sa Puerto Princesa.

“Dati may posisyon ako…na puwede tayong tumanggap ng bisita provided na sila ay bakunado, bisita I mean tourist. Tapos RT-PCR negative ng dumating sa Puerto tapos nag-test din sila [ng] Antigen at negative pa rin, puwede na sila dumating dito.”

“Kaya lang hindi na pursue yung ganung proposal, hindi ko lang alam kung i-brought out o i-raise ulit yung ganung issue…kung mapagbibigyan, pero maaari mapag-usapan yan.”  mga naging pahayag ni Atty. Pedrosa.

Base umano sa mga medical expert kapag ang isang tao ay kumpleto na sa bakuna laban sa COVID-19 ay mababawasan ang mas malalang epekto ng virus.

Samantala posibleng mapag-usap ng IATF at maikunsiderang payagan ito, lalo na’t malaki ang epekto ng pandemya sa sector ng turismo sa lungsod.

Leave a Reply

Your email address will not be published. Required fields are marked *