Update | Lineman nga nabungguan sang motorsiklo sa banwa sang Panitan, ginbawian sang kabuhi

Ginbawian sang kabuhi ang isa ka lineman samtang ginabulong sa ospital matapos nag-angkon sang patal nga pilas sa ulo kag dughan sa nagluntad nga aksidente sa Sitio Ilaya, Brgy. Salocon, Panitan, Capiz.

Matandaan, nga samtang ginasubay ni Joel Bautista, 57-anyos, isa ka lineman, ang dalanon nagikan sa ila puluy-an padulong kuntani sa ila garahe kag sang ini ang magaliko aksidente ini nga nabungguan sang motorsiklo nga ginamaneho ni Mark Diaz, 28-anyos, mekaniko kag residente sang Barangay Palanguian, Maayon, Capiz.

Bangud sa natabo, lunsay nagkalatumba ang mga ini kag nag-angkon sang mga pilas sa magkatuhay nga parte sang ila lawas.

Ginapahayag nga madasig ang pagpadalagan ni Diaz sa iya motorsiklo.

Ginpadangat sa magkatuhay nga ospital ang duha apang si Bautista ang gindeklara nga patay ni Dr. Jennelou Ballon, attending physician sa Health Centrum Hospital takna alas 7:22 kagabi sang Huwebes.

Sa karon, ang bangkay sang biktima ang yara na ini sa isa ka punerarya sa banwa sang Panay. | Judy Ann Juare