Yara na sa estable nga kondisyon ang lapsag nga babayi matapos ini nga ginpaidalom sa operasyon kag nadesisyonan sang mga doktor nga utdon nalang ang nawala nga tiil sini agud indi na maglapta ang rabies tuga sang pagkagat kag pagtaban sang ido.
Ini ang ginpahayag ni Police Senior Master Sergeant Ramil Arcangeles, tagpamaba sang Roxas City Police Station sang ma-interview sang Brigada News FM.
Suno kay Arcangeles, nakita sa CCTV footage nga may yara sang tricycle nga nagsulod sa area kun sa diin ginbilin ang lapsag pasado ala una sang kaaganhon.
Matandaan sadtong Pebrero 23, Huwebes nga adlaw natalupangdan na lamang sang isa ka residente ang isa ka bag-o bun-ag nga lapsag nga babayi sa idalom sang ila sofa nga wala na ini sang natuo nga hita kag bali ang nawala nga tuhod, matapos nga gintaban sang ila hinuptan nga ido.
Sa karon, padayon pa nga ginapadalman sang imbestigador sang Roxas City PNP ang video footage agud matumod kag mapanabat ang yara sa likod sa pag-abdonar sa amo nga lapsag. | Judy Ann Juare