Hagbong sa kamot sa mga otoridad human nga malampusong nadakpan ang usa ka indibidwal nga maoy ika-upat sa most wanted person sa tibuok Caraga Region human sa 16 ka tuig nga nag tago-tago ug dugay nang gipangita sa balaud.
Operasyon gipahigayon pinaagi sa hiniusang pwersa sa kapulisan dinhi mismo sa may Brgy. Langkilaan, Trento, lalawigan sa Agusan del Sur bandang alas 3 ang takna sa hapon kagahapong adlawa.
Suspetsado giila sa pangalang Mario C. Obat, 51-anyos, ug residente sa nasangpit nga lugar. Base sa report sa Police Regional Office 13, suspek kini sa pagpamusil sa usa ka lalaking biktima 17 ka tuig na ang milabay.
Ang warrant of arrest nga batok sa suspetsado mao ang kasong Murder ilawom sa Criminal Case Number 2005-4-2913-B nga gi-isyu sa Regional Trial Court, 11th Judicial Region, Branch 29, Bislig City, Surigao del Sur ug pinetsahan niadtong Abril 8, 2005. Nasikop ang nahisgutan gumikan sa tabang sa intelligence unit sa kapulisan.
