Usa ka agila nga nakuha sa bukirang bahin sa barangay Pangyan Trento, Gikagubtan

Padayon karon nga gikagubtan sa kadaghanan ang usa ka Philippine eagle o’ Pithecophaga jefferyi nga usa ka langgam nga makita lamang sa nasud sa Pilipinas nga nakuha niadtong nakalabayng mga adlaw sa brgy. Pangyan, sakop sa lungsod sa Trento, Agusan del Sur.

Nasayran usab nga usa kini ka agila nga dunay kakapas nga mokaon ug hayop sama na lamang sa unggoy, ug gitawag usab nga haribon o’ haring ibon.

Base sa impormasyon sa usa ka mag-uuma nga si Rey Borlaza, ang nakakuha mismo sa agila, gibutyag pa niini nga naka-angkon pa siya ug samad sa iyang bukton gumikan sa koko niini sa kamot nga nilapos sa iyang panit atol sa iyang pagkuha. Gidugang pa niini nga dakong katingala niya gumikan kay walay samad ang maong langgam apan nag kamang kini padulong kaniya hinungdan nga iya kining daling gidakop ug walay langan nga giturn-over ngadto na kang Barangay Kapitan Joyren C. Duron sa barangay Pangyan.

Sa kasamtangan anaa na karon sa buhatan sa Municipal Environment and Natural Resources Office ang maong langgam o agila nga giila nga Pambansang ibon ng Pilipinas.
-END-