DAKO ang kalipay sa usa ka amahan nga nangita sa iyang anak nga nanarbaho sa Gensan gikan sa Kalbay, Jose Abad Santos, Davao Occidental.
Oktubre 15 nidangop sa Brigada ang usa ka amahan nga nagpangalang Rosvel Abalay kuyog ang iyang anak nga si Shine,12-anyos, ang ilang problema mao ang pag-uli sa ilang lugar.
Sumala kay Abalay adunay usa ka negosyante nga taga Gensan nga nagabyahe sa ilang dapit unya gi-ingnan siya nga patrabahoun ang anak sa Gensan, ang trabaho mobantay og bata ug manglaba.
Sobra na daw lima ka bulan sukad gidala ang iyang anak ug wala siyay cellphone aron makontak si Shine ug dugay na nga wala kabalik ang negosyante sa Kalbay mao nga nabalaka siya sa kahimtang sa iyang anak.
Gidugang ni Abalay nga nakahukom siya nga moadto sa Gensan agi sa Glan pinaagi sa pagbaklay, nangutana siya sa mga driver sa pickup nga naga turno sa Lagao terminal, nagpatala sa prsento sa pulis ug nanawagan sa social media aron makita ang anak.
Sa milabay nga adlaw nga Domingo napalgan na gayod niini ang balay sa amo sa iyang anak pinaagi sa pagbaklay, mao nga iyaha kini nga gikuha.
Tungod niini nakahukom si Abalay nga dili na gayod ipadala si Shine sa bisan kinsa, dili na niya pa trabahuon kay naga-eskwela pa ang iyang anak. (Ver Diazon)