Napatay sa engkwentro ang usa ka miyembro sa rebeldeng NPA human makigbinayluay ug tingga sa mga tropa sa kasundaluhan sa Sitio Panukmuan, Brgy Diatagon, Lianga, Surigao del Sur sayo sa buntag adtong nakalabay nga adlaw.
Naila ang napatay nga rebelde nga si Adring Acevedo Alyas Diego, 49 anyos, lumulupyo sa Sitio Nalindog, Brgy. Bolhoon, San Miguel, Surigao del Sur. Sumala sa report nga adunay nagtaho nga usa ka concerned citizen nga adunay presensya sa armadong grupo sa lugar.
Dali guilayong mihimo ug focused military operation ang tropa sa 75th Infantry( Marauder) Battalion ug naka-engkwentro ang gibana-banang 10 ka miyembro sa rebeldeng NPA. Milungtad ug 20 ka minutos ang pagbinayluay sa mga masipang buto hangtud nga mi-withdraw sa maong lugar ang rebeldeng NPA.
Sa ginahimong clearing operation, nadiskubrean ang usa ka makeshift nga kampo nga mu-akomodar ug 10 ka tawo, nadiskubrean ang wala nay kinabuhi nga rebeldeng NPA nga nailang si Adring Acevedo Alyas “Diego”. Narekober sa area ang usa(1) ka AK47 rifle, usa ka M4 rifle, usa ka carbine cal.30 ug personal nga kagamitan. Ang patayng lawas sa napatay nga rebelde ang gipahimutang sa Duran Funeral Homes, Marihatag, Surigao del Sur samtang gihulat ang mga kabanay nga mu-claim niini.
Gipasalamatan sa Commanding Officer sa maong batalyon nga si Lieutenant Colonel Jelson D Buyuccan ang pagpaningkamot sa iyang tropa nga mapabilin nga malinawon ang lugar ug mapahunong na ang ginahimong extortion activities sa rebeldeng NPA.
-END-
