Usa ka panagatan gikan sa Saeg, Calumpang naigo sa buhawi, 18 ka mga sakay naluwas

NALUWAS sa makuyaw nga kahimtang ang 18 ka mga mananagat nga sakay sa usa ka bangkang panagatan sa kadagatan nga sakop sa Balut Island, Davao Occidental Abril 2 sa kaadlawon sa tuig 2023.

Sumala sa ilang kapitan sa bangka nga gitawag nilang bote-bote nga si Paul Rubio nigikan sila sa Purok Saeg, Barangay Calumpang, General Santos City Abril 1 sa kaadlawon unya nakaabot sila sa kadagatan nga sakop sa Balut Island unya diretso nihulog sa ilang pukot.

Alas tres sa kaadlawon aduna daw niagi nga buhawi ug maoy nakapadaku sa mga balud ug apil siya sa nahulog sa bangka, nilangoy ug nakabalik sa bangka apan nihinay sa pagkaunlod hangtud nga sila natabangan.

Sumala sa usa sa nag rescue nga sakay sa Boat Ranger sa laing panagatan nga si Eric Baylon,nadungog nila sa radyo ang nahitabo sa kauban nila nga taga Saeg mao nga nangyo usab siya og rescue sa laing mga sakayan.

Nagapasalamat usab ang tag-iya sa panagatan nga si Norivelle Rubio nga walay nakalas nga kinabuhi sa 18 ka mga mananagat, pasalamat usab kini sa taga Palimbang nga nitabang,sa iyang bana-bana anaa sa tulo ka milyon ang ilang lugi sa 14 ka mga pakura nga nangawala unya sa starting o capital.

Nagapasalamat usab ang Purok Chairperson sa Saeg nga si Jimmy Combenido nga walay kinabuhi nga nakalas sa iyang mga sakop nga mga mananagat. I Ver Diazon