Nahulog ha kamot an usa nga 18-anyos nga lalake ha gindumara nga operasyon kontra ilegal nga droga han Catbalogan City Police Station Drug Enforcement Team ha Diversion Road, Brgy. Mercedes, Catbalogan City, Samar.
Ginkilala an suspek nga hi alyas Rey, 18 anyos, senior high school student, ngan residente han P-8, Brgy. Canlapwas, Catbalogan City, Samar.
Ginpangunahan an mao nga operasyon han mga tinaglawas han Station Drug Enforcement Team ha pamumuno ni PMAJ NIÑO CABAÑAS ha ilarom han deriktiba ni PLTCOL EDWIN M OLOAN JR, Officer In-Charge han Catbalogan CPS.
Narekober ha suspek an mga drug paraphernalia ngan upat kabug-os nga heat-sealed plastic sachet nga mayda sulod han ginsususpetsaran nga shabu nga mayda 0.007 gramo nga nagkakantidad hin P4,000.
Presente naman nga nakadeteni na an suspek ha Catbalogan CPS ngan gin-aandam na an kaso nga pagtalapas ha Section 5 ngan 11 han RA 9165.