Vaccination para sa A2 category mahimo madigay pa – PHO

“It’s still a long way”. Ini ang ginpahayag ni Provincial Health Officer Dr. Ernell Tumimbang may kaangtanan sa mahinay nga dalagan sa karon nga vaccination drive sang probinsya sang Negros Occidental kun sa diin mahimo madugayan agud malambot ang “herd immunity” ukon ang population protection ilabi na sa pagpangbakuna sa mga pumuluyo yara sa A2 category ukon mga senior citizens.

Suno kay Tumimbang sa pihak ginahatagan sa karon sang pagtamod sang iya talatapan ang pagpatigayon sang house to house vaccination apang sa gihapon mahinay ukon pipila lamang ka mga persona sa idalom sang A2 category ang nagapabakuna.

Isa sa nakita nga mayor nga problema sang PHO ang kahinay sang dalagan sang vaccination ilabi na sa karon nga panahon sang kampanyahanay para sa palaabuton nga Mayo 9 nga National kag Local elections.

Sa record sang PHO ang fully immunized yara pa lamang sa 54 porsyento apang ginahimo sang nasambit nga talatapan ang tanan nila sini nga masarangan kaangay sa mga paghatag sang insentibo sa mga barangay health workers kag mga senior citizens agud sa sina magasaka man ang numero sang mga magapabakuna.

Ginpaalinton dugang ni Tumimbang may mga kabudlayan man natuhoy sa pagpatigayon sang house-to-house vaccination bangud sa insureksyon ilabi na sa syudad sang Himamaylan, banwa sang Candoni kag iban pa nga dapat hatagan sang kunsiderasyon sang PHO upod sa tagsa ka mga city kag municipal health offices.