“Volume of production” nin abaca sa Catanduanes, buminaba ngunyan na taon huli sa peste, pandemya asin kalamidad

BICOL—Katakod kan huring aldaw nin selebrasyon nin Abaca Festival sa Catanduanes ngunyan na aldaw nin Biyernes, tigpahayag ni Roberto Lusuegro kan Philippine Fiber Development Authority, na buminaba ang volume of production nin Abaca ngunyan na taon sa isla kung ikukumpara sa mga nag aging taon.

Segun sa opisyal, iniyo suboot ang naging epekto kan pesteng bunchy top; pandemyang dara kan COVID-19 asin an naging panlalamasa nin bagyong Rolly sa Catanduanes kan nagtalikod na taon.

Pirang bulan makalihis ang pandidistroso nin kalamidad, asin sa ibong kan nagpapadagos na krisis dara kan pandemya dawa papano nakabawi-bawi naman ang mga paratanom nin Abaca alagad segun ki Lusuegro, nangangaipo an Catanduanes nin P121-M na pondo para dagos nang maibangon an industriya kaini.

Nangako naman suboot an Department of Agriculture na iyo ang matao nin pondo para digdi alagad hasta sa ngunyan, hinahalat pa ini kan probinsiya. Sa kabilugang datus kan PhilFIDA, nasa 13, 975 ang mga abaca farmers sa Catanduanes gikan sa 233 na mga top producing barangay sa probinsiya.

Nasa 36,744 man ang tota land area na tanuman nin abaca kaya masasabing ini talaga ang mayorya sa pinagkukuanang hanapbuhay kan mga Catandunganon, apwera sa pagsisira asin pag-uma.

Sa pagtatapos kan Abaca Festival ngunyan na aldaw, urgolyo kan bilog na Catandanes na sinda ang primerong probinsiya sa bilog na nasyon na nakaka produce nin 88% biggest volume of abaca production sa bilog na Pilipinas.-30-

Photo Courtesy: Catanduanes Tourism Promotion AbaCapture Entry No. 4