Wala pay lead ang kapulisan kon si kinsa ang mga suspek nga naglugos-patay kay Vlanche Marie Bragas, ang 28 anyos nga architect kansang patayng lawas nakaplagan sa banana plantation sa Calinan alas 8 sa buntag niadtong Myerkules.
Gibutyag ni Police major Catherine dela Rey, DCPO spokesperson nga base sa resulta sa autopsy examination, nasuta nga gitook sa mga suspek ang biktima nga niresulta sa iyang kamatayon.
Nigawas usab sa finding ang “recent genital trauma,” nga maoy nagkumpirma nga positibong nalugusan gayud ang biktima.
Unang nakaplagan ang patayng lawas sa biktima nga gitabunan ug mga dahon sa saging particular sa banana plantation nga gipanag iyahan sa Subasta Agrarian Reform Beneficiaries Agricultural Cooperative (SARBAC) sa Purok 6 Barangay Dacudao, Calinan District, Dvo City.
Nagbangutan ang United Architect of the Philippines-Davao City chapter sa mangilngig nga gidangatan sa kaubanan nilang architect.
LUyo sa tulo ka mga ngilngig nga krimen nga nanghitabo sa Davao ning nilabayng mga adlaw, gikunsidera gihapon sa DCPO nga sa kinatibuk an, peaceful ang Davao City ug ang mga panghitabo isolated cases lamang matud pa.
Samtang, nagpagawas na og abiso ang DCPO sa publiko kalabotan sa rape with homicide kang Bragas nga kung kinsa man ang makatudlo sa suspek mamahimong mukontak sa hotline no. 0998-598-7054, 0916-659-2576 ug (082) 227 – 5777. Gipasalig sa buhatan nga pabiling confidential ang pagkatao sa kinsa mang makahatag og impormasyon sa kapulisan.