Idineklara na ang Isabela bilang Avian Influenza o Bird Flu Free Province matapos maging negatibo na ang isinagawang test result ng DA-Bureau of Animal Industry.
Ayon sa DA Regional Field Office 2, unang nakumpirmang mayroong kaso ng Highly Pathogenic Avian Influenza Subtype H5N1.
Unang nagkaroon ng kaso ng naturang sakit sa Cauayan City, Alicia at Gamu noong April 21, May 23 at November 7, 2022.
Nag-negatibo ang resulta matapos ang patuloy na monitoring at surveillance sa 1-km and 7-km surveillance zones sa mga chicken layer, duck, pigeon at native chicken.
Dahil dito nagsagawa ng aksyon ang kagawaran upang mapigilan ang pagkalat nito kabilang na ang pagsasagawa ng depopulation, disinfection, movement restrictions at iba pa alinsunod sa Avian Influenza Protection Program guidelines.
Bukod dito naglabas din ng Executive Order ang Pamahalaang Panlalawigan ng Isabela na bumubuo ng Provincial Task Force Bird Flu, nagsagawa ng info drive,biosecurity measures, quarantine activities at iba pa.
Pinuri naman ni DA OIC Regional Executive Director Dr. Rose Mary Aquino ang lalawigan ng Isabela matapos ang pagdedeklara ng Isabela bilang bird flu free.