Maayos na naidala sa Commission on Elections sa Lungsod ng Cauayan ang mga balota na hawak ng mga guro matapos harangin ng ilang supporters ng natalong kandidato sa pagka-barangay opisyal.
Ito ang kinumpirma sa isang panayam kay PNP Cauayan City Chief of Police PLTCol. Ernesto Nebalasca Jr. kung saan isang polling center umano sa lunsod ang nagkaroon ng ganitong insidente.
Aniya, nang magbabalik na ng election paraphernalia ang mga gurong nagsilbi sa halalan ay hinarang umano sila ng ilang taga-suporta ng natalong kandidato.
Sa puntong iyon, agad namang napigilan ng miyembro ng kapulisan ang nasabing mga taga-suporta at maayos na naibalik ng mga guro ang mga election paraphernalia sa COMELEC.
Dagdag pa ng opisyal, sa mismong araw ng eleksyon ay mayroon silang mga natanggap na impormasyon na mayroong namamahagi ng flyers at sample ballot ngunit nang tunguhin nila ay wala nang naabutan.
Sa kabila nito, matiwasay at mapayapa aniya ang isinagawang Barangay at Sangguniang Kabataan Elections 2023 sa lunsod ng Cauayan.