Muabot na sa 28 ka Overseas Filipino Workers o OFW ang nagpositibo sa Covid-19 gikan sa dos mil ka mga returning ug repatriated OFWs nga miabot sa Davao City International Airport sugod niadtong bulan sa Hulyo karong tuiga.
Sumala kang Davao City Tourism Office Chief and Airport Monitoring head Generose Tecson ang mga nagpositibo gilahi og isolation facilities samtang tulo kanila ang gidala sa ospital tungod sa gipakita nga sintomas.
Subay sa talaan, moabot na sa 1,949 ka mga indibidwal sakay sa walo ka mga repatriation flights gikan sa United Arab Emirates, Bangladesh, Kuala Lumpur, ug ubang nasud ang ang niabot sa Davao City.
Gani, samtang gina-quarantine dunay lima ka mabdos ang nanganak sulod sa quarantine facilities sa syudad ug gibutyag usab niini nga dunay usa ka hamtong nga lalaking OFW ang namatay tungod sa sepsis shock unom ka adlaw pa lang ang nakalabay. Kahibaluang duna pay duha ka repatriation flights gikan sa UAE ang moabot sa Davao City karung semanaha nga deretsong ipailawum sa 14days quarantine ug subling ipang-swab test pag-abot sa ika-7 nga adlaw ayha papaulion sa sa ilang mga balay kung mag-negatibo. BNFM-DAVAO
